Ég heiti Bragi Bjarnason og er oddviti Sjálfstæðisflokksins í Árborg. Hef verið bæjarstjóri frá 1.júni 2024 og áður formaður bæjarráðs frá árinu 2022.  

 

Ég er 44 ára, giftur Eygló Hansdóttur, íþróttafræðingi og saman eigum við þrjú börn, Bjarna Dag fæddan 2007, Hildi Evu fædda 2011 og Elmar Andra fæddan 2016. Við fjölskyldan höfum verið búsett á Selfossi síðan 2005 en Eygló er uppalin Selfyssingur og ég er úr sveitinni rétt við Hellu á Rangárvöllum þar sem ég ólst upp á sveitabænum Selalæk. 

 

Ég er menntaður íþróttafræðingur, með MBA gráðu frá Háskóla Íslands, frá árinu 2020. Hef starfað hjá Sveitarfélaginu Árborg í 18 ár og fullur metnaðar að nýta þá reynslu og þekkingu sem ég hef til áframhaldandi vinnu fyrir samfélagið á breiðum vettvangi.

 

Ég hef í gegnum tíðina komið að fjölbreyttum störfum, bæði með námi og eftir. Má þar nefna framkvæmdastjóri íþróttafélags, smiður, málari, íþróttakennari og þjálfað alla aldurshópa í íþróttum og líkamsrækt.

 

Ég hef verið svo lánsamur að fá tækifæri til að vinna með fjölbreyttum hópi í hinum ýmsu nefndarstörfum og m.a. setið í skólanefnd Menntaskólans á Laugarvatni, samráðshópi um stefnumótun í íþróttamálum á Íslandi og sem varamaður í Íþróttanefnd ríkisins. Einnig hef ég setið í nemendaráðum, stúdentaráði og stjórn félags íþrótta-, æskulýðs-, tómstundafulltrúa á Íslandi frá 2011, þar af sem formaður 2016-2020. Á yfirstandandi kjörtímabili hef ég verið í stjórn Brunavarna Árnessýslu, Bergrisans br., Sorpstöðvar Suðurlands og fleiri nefnda sem fulltrúi Sveitarfélagsins Árborgar. Ekki má gleyma foreldrastarfinu þar sem ég hef reynt að aðstoða eftir bestu getu í foreldraráðum tengt frístundastarfi barnanna.

 

„Það er að mínu mati frábært að ala upp börn í Árborg og vil ég leggja allan minn metnað í að það verði áfram þannig og við náum frekar að gera enn betur“

 

Ég sækist aftur eftir oddvitasæti Sjálfstæðisflokksins þar sem ég tel að kraftar mínir nýtist til að leiða samstilltan hóp fólks til góðra verka fyrir samfélagið. Öflugt lið þar sem allir hafa rödd og stuðning til að ljúka verkefnum og ná settum markmiðum. Það hefur gengið vel á síðustu fjórum árum og mörg tækifæri til að gera enn betur á næstu árum.